Акафист

Пресвятой Богородице перед иконой, именуемой «Грузинской»:

Кондак 1

Избранней от всех родов, Божией Матери и Царице пред пречистым Ея образом, со умилением хвалебная пения приносим: Ты же, яко имущая к роду христианскому милосердие неизреченное, от бед и скорбей избави всех нас Тебе зовущих: Радуйся, Невеста Неневестная.

Икос 1

Архангелов и Ангелов чини благоговейно Тебе служат и вся Небесныя Силы немолчными гласы Тя, Богородице Дево, воспевают, яко рождшую небесных воинств Царя: мы же земнороднии, трепетно предстояще чудотворному Твоему лику бренными устнами вопием Ти сице: Радуйся, от всех родов ко искуплению рода нашего избранная; Радуйся, Духа Святаго дарований преисполненная. Радуйся, Херувимов и Серафимов превозшедшая; Радуйся, таинству спасения рода человеческаго послужившая. Радуйся, святое вместилище Слова Божия; Радуйся, неописанное Слово Отчее в ложеснах Своих носившая. Радуйся, пророческих глаголов неложное исполнение; Радуйся, вину прародителей рода нашего рождеством Твоим искупившая. Радуйся, предстательство роду христианскому от Бога дарованное; Радуйся, спасения рода человеческаго начало. Радуйся, лествице Божественнаго снисхождения; Радуйся, мосте от земли к небеси земнородных возводяй. Радуйся, Невесто Неневестная.

Кондак 2

Видящи Пречистая с высоты небеснаго жилища Своего, идеже с Сыном Своим во славе пребывает, озлобление противу святынь христианских во стране Грузинстей, попущением Божиим во дни оны бывшее от Персскаго царя Аббаса, Грузинскую страну разорившаго и храмы Ея христианския осквернившаго, и хранящи святую икону от таковаго поругания, страны Российския мужу верну и благоговейну Стефану, благопромыслительне ведати ю вспомоществовала еси, Владычице. Стяжав убо сей верный раб святыню Твою, во умилении сердца, возопи Богу: Аллилуиа.

Икос 2

Разумети хотя благоговейный муж Георгий недоуменную тайну откровения Твоего, Владычице, о некоем бесценном бисере, приставником имения его во стране Персидстей приобретеннем, с Патриархом Филаретом совещашеся. Мы же таинственному вразумлению Преблагословенныя, свыше верным рабом подаваемому, дивящеся, благоговейно вопием к Ней: Радуйся, сокровенныя тайны благодати Божия верным открывающая; Радуйся, устнами православных хвалу Богови совершающая. Радуйся, неверных агарян, святыню Твою презревших, посрамляющая; Радуйся, славою чудес Твоих верных смыслы озаряющая. Радуйся, почитанию святых икон нас наставляющая; Радуйся, Христову веру во стране нашей утверждающая. Радуйся, обитель иноков Красныя Горы святым Твоим образом освящающая; Радуйся, день принесения честныя Твоея иконы изцелением инока знаменовавшая. Радуйся, безценный бисер, святую Твою икону, якоже рекла, нам даровавшая; Радуйся, безценный бисер, Христа, на спасение наше рождшая. Радуйся, честным Твоим образом страну нашу посетившая; Радуйся, мирную обитель иноков неотъемлемым богатством обогатившая. Радуйся, Невесто Неневестная.

Кондак 3

Сила Вышняго осеняет выну с верою притекающих к державному покрову Твоему, Владычице, и благоговейно чтущих чудотворную икону Твою, Богомати: ей бо дадеся благодать от Бога всяк недуг и всяку язю в людех врачевати, темже благодарственно вопием Богу: Аллилуиа.

Икос 3

Имеющи промышление теплое о людех зимныя полунощи, Гору Красную под кров Твой, Богомати, прияла еси, и обители иноков тоя честный образ Твой милостивно даровала еси: да зряще токи чудес, преизобильно на молящихся Тебе с верою изливаемыя, во умилении, вопиют Тебе, Владычице: Радуйся, смиренную обитель иноков Красныя Горы державным покровом Твоим осеняющая; Радуйся, чудесами от святыя Твоея иконы Гору Красную прославляющая. Радуйся, подобие благодатнаго Афона на зимней полунощи явившая; Радуйся, Гору Красную житию иноческому чудно указавшая. Радуйся, в щит и ограждение места того цельбоносную икону Твою даровавшая; Радуйся, поселившымся на сей святей горе инокам обитель тихую создавшая. Радуйся, житие чина иноческаго во спасение душ устрояющая; Радуйся, всем хотящым улучити спасение споборствующая. Радуйся, Красную Гору и обитающих на ней благодатным Твоим омофором покрывающая; Радуйся, притекающих к Твоему покрову и заступлению не оставляющая. Радуйся, слабых на пути добродетели укрепляющая; Радуйся, заблудших на путь истинный наставляющая. Радуйся, Невесто Неневестная.

Кондак 4

Бурю внутрь имея помышлений сумнительных слепец Питирим, егда озарен бе сиянием света, яко солнечным, смятеся и страхом обдержимбе, мняше о сем, яко о навождениибесовстем: многабо лета слеп бе, с молитвою знамение креста сотвори, обращься ко храму и узре чудную Твою, Владычице, икону, светозарными лучами во храме блиставшую, абиеуразуме, яко отверзошася очи его и слух его открыся, благодарственное принес Богу, дивному в делех, пение: Аллилуиа.

Икос 4

Слышав благоверный царь всея России Алексий, яко от святыя иконы Твоея, Владычице, яже на Горе Красней, цельбы многоразличных недуг обильно подаются, даде повеление игумену обители по градом и весемвеликия державы своея с честию подобающею ю обносити: да приемлют страждущииврачество недугов телесных и душевных и во умилении сердец взывают Тебе, Владычице: Радуйся, Христа Бога нашего освященный храм; Радуйся, неизреченныя Его славы вместилище. Радуйся, Царя царствующих одушевленный граде; Радуйся, палато и чертоже небесный. Радуйся, церкви православныяпохвало; Радуйся, державы Российскиякрепосте и утверждение. Радуйся, градов и весей наших благодатное охранение; Радуйся, всех христиан, к Тебе притекающих, непостыдное упование. Радуйся, от всех родов достойно ублажаемая; Радуйся, всех нас от бед и скорбей пришествием честнаго Твоего образа избавляющая. Радуйся, сущих в странствии ко взысканию горняго града направляющая; Радуйся, Путеводительнице наша к вечным обителем. Радуйся, НевестоНеневестная.

Кондак 5

Боготечней звезде подобна явися Твоя, Богомати, икона, по воли Твоей святей от востока на самую полунощь принесенная, юже, яко дар небесный, восприемшеиноцыКрасногорстии, поставиша в соборную церковь обители, и в веселии пояху благих подателю Богу: Аллилуиа.

Икос 5

Видещисреброковача Гавриила, зельне плачуща пред Твоим чудотворным образом, Владычице, якожебо тогда умилосердися, сына его на одре болезни лежаща воздвигла и здрава сотворила еси, сице и о мне умилосердися, Преблагословенная Богородице, и грехми умерщвленную мою душу воскреси, зовущу: Радуйся, Мати Царя живота и Победителя смерти; Радуйся, благоволение Сына Твоего, Христа Бога нашего, нам стяжавшая. Радуйся, светлыми лучами чудес от святыяТвоея иконы страну Российскую озаряющая; Радуйся, богатыя дары изцелений и милостей просящымТя пред чудною Твоею иконой источающая. Радуйся, моления наша, приносимая Тебе с верою и любовиюмилостивно приемлющая; Радуйся, телесные недуги верно почитающих Тя скоро изцеляющая. Радуйся, печаль нашу в радость претворяющая; Радуйся, от слез и скорбей нас избавляющая. Радуйся, скорбных о чадех родителей утешение; Радуйся, чад их благодатное охранение и спасение. Радуйся, покрове нам в животе и по смерти; Радуйся, спасение наше на праведном суде Божием. Радуйся, НевестоНеневестная.

Кондак 6

Проповедника творящи купца Георгия воли Своея, реклаеси к нему, Владычице: приставник имения твоего Стефан, сый в Персиде, купи тебе бесценный бисер, егда же принесет к тебе, ты посли оный в Двинскую область, на Чермную гору. Познав убо о сем Георгии Твое, Пречистая, к месту тому особое благоволение, воспряну воспети к рождшемуся от Тебя Богу: Аллилуиа.

Икос 6

Возсияла слава Божия на святей Горе Красней от пречудныяТвоея иконы, Богомати, пред неюжепредстояще, со умилением молимся Ти, услыши нас, вопиющих Тебе усердно: Радуйся, Гору полунощную пришествием чудотворнаго Твоего образа осенившая; Радуйся, чудес неоскудевающий источник на ней явившая. Радуйся, милосердие и любовь Твою к обители иноков показавшая; Радуйся, благое о ней промышление Свое явившая. Радуйся, телесныя недуги наша врачующая; радуйся, в душевных скорбех нас утешающая. Радуйся, благочестия Наставнице; Радуйся, иноческаго жития Руководительнице. Радуйся, добрыяко спасению душ обеты приемлющая; Радуйся, благим намерением и начинанием нашим способствующая. Радуйся, злыя от навождения врага бываемая помыслы от нас отгоняющая; Радуйся, вражия козни, яко паучину, расторгающая. Радуйся, НевестоНеневестная.

Кондак 7

Хотя дати благословение новоустроенней обители иноков, Раифскойнареченней, Архипастырь Казанский Лаврентий, лик Твой, Владычице, от чудотворнаго Твоего Красногорскаго образа тождественно списав, торжественно с молебным пением, во обитель Раифскуювнесе. Свидетелем же быв совершившихся от сея святыяТвоея, Владычице, иконы знамений и чудес, радостно возопи Богу: Аллилуиа.

Икос 7

Новую купель Силоамскую зрим, Пречистая Богородице, храм Твой, иже в Раифе: всяк бо недуг и всяку язю душевную и телесную врачуеши с верою и любовию к Тебе притекающих и благоговейно чтущих и лобызающих святый образ Твой. Сего ради, имуще новое неизреченное сокровище Твоих милостей, радостно вопием Ти, Пречистая: Радуйся, купель, в нейжедушевныя недуги наша, врачуются; Радуйся, источничежаждущим воду жизни источивший. Радуйся, слепым телеснымаочима зрение подавающая; Радуйся, глухим слух отверзающая. Радуйся, разслабленныя телом укрепляющая; Радуйся, лежащыя на одре болезней возставляющая. Радуйся, плавающыя по водам от бурь и потопления спасающая; Радуйся, влающыяся в пучине житейскаго моря к тихому пристанищу спасения направляющая. Радуйся, оружие, имже устрашаются полки демонския; Радуйся, щите, имже покрываются обители иноков. Радуйся, тихое пустынножителей веселие; Радуйся, тихое обуреваемых в сем веце пристанище. Радуйся, НевестоНеневестная.

Кондак 8

Странно слышати и неудобно разумети злым неверием омраченным, како от святых икон Твоих, Владычице, знамения и чудеса бывают: нам же тепле верующим словеси, Тобою к первоначертанней благовестником евангельских тайн святей иконе реченному: благодать рождшагося от Мене и Моя с сим образом да будет, удобно есть разумети и праведно уповати, яко и с нею святою Твоею иконой, "Грузинскою", благодать Твоя и сила пребывает выну: сего ради с благоговейным страхом предстояще, чтем и воздаем ей честь, яко Тебе самой, нам присущей, радостно поюще Богу: Аллилуиа.

Икос 8

Вся присно горе сущи и с Небесными Силами выну пребывающи, нас земнородных не оставляеши, Богомати, теплым предстательством пред Сыном и Богом Твоим: матернее бо дерзновение к Нему имаши. Сего ради предстояще пречистому Твоему образу, со слезами покаяния вопием те, Богородительнице: Радуйся, Путеводительнице верная, к небесному отечеству добре нас направляющая; Радуйся, Мати Царя небеси и земли, врата райские нам отверзающая. Радуйся, Домостроительнице, житие наше к небесному устрояющая; Радуйся, вечная блага Сына Твоего нам являющая. Радуйся, от скорбей и бед зде нас спасающая; Радуйся, вечных мук и огня геенскаго по смерти нас избавляющая. Радуйся, всех притекающих с верою и любовию к Тебе сугубо милующая; Радуйся, молитвы наша, приносимыя Тебе пред чудотворным Твоим образом, ко престолу Сына Твоего и Бога нашего возносящая. Радуйся, благая наша Помощнице; Радуйся, непостыдное наше упование и верное спасение. Радуйся, НевестоНеневестная.

Кондак 9

Всякаго естества Архангельскаго и АнгельскагоПревысшая, Херувим и Серафим Честнейшая, Пресвятая Дево, Бога бо Царя Небесных Сил плотию родила еси, Носящаго весь мир дланию на руках носила еси, и всякое естество Питающего млеком питала еси: темже воистину Матерь Божию и Ходатаицу рода христианскагоТяведуще, со дерзновением вопием Богу: Аллилуиа.

Икос 9

Ветиимноговещаннии не ведяткиимисловесыблагохвальными подобает величатиТя, Богомати, по достоянию, недоумеетбо всяк язык достойно петиТя, Богородице: обаче, Благаясущи, приимимилостивно, аще и немощными смыслы сложенная, но от чистагосердца приносимая Тебе в похвалу сицевая пения: Радуйся, пренепорочная Отроковице, превечным советом ко спасению рода нашего избранная; Радуйся, Жено, Еяже семя сокруши главу древняго змия. Радуйся, в женах Преблагословенная; Радуйся, благодать у Бога обретшая. Радуйся, Архангельское вещание о воплощении Единаго от Святыя Троицы смиренно приявшая; Радуйся, кроткая раба Господня. Радуйся, сосуде, Духом Божиим освященный; Радуйся, силою Всевышняго осененная. Радуйся, Спасителя наших душ рождшая; Радуйся, падший род наш с правосудием Божиим примирившая. Радуйся, Едем затворенный рождеством Твоим миру отверзшая; Радуйся, от пленения ада рождеством Твоим свободившая. Радуйся, НевестоНеневестная.

Кондак 10

Спасти хотящимногия люди от бед и скорбей, всюду являеши, Богомати, роду нашему неоскудеваемый от своея иконы "Грузинския" источник милости. Красногорскуюбо обитель от запаленияогненнагово дни оны неврежденну сохранила еси, угасивши свирепеющую окрест ея силу огненную, в царствующем же граде Москве и в пустыни Раифстей благодати струи от иконы Твоеяисточаеши всем, с верою покланяющымся Тебе, и во иных градех и весях наших чтущымТя полезное подаеши. Темже, прославляюще Бога, даровавшаго нам о Тебе благодать таковую, присно вопием Ему: Аллилуиа.

Икос 10

Стена еси крепкая, Богородице Дево, обители Красногорския и пустыни Раифския ограда несокрушимая, чину же иноческому украшение и слава. Сего ради, молящеся, вопием Ти, Пречистая: покрый с верою покланяющыяся Тебе пред Твоим чудотворным образом от бед и скорбей, с любовию Тебе вопиющих: Радуйся, крепкая от находящих на ны напастей и бед Хранительнице; Радуйся, обителей иноческих неусыпная Блюстительнице. Радуйся, от свирепеющаго пламене, во дни оны, обитель Красногорскую, по теплому молению иноков, дивно сохранившая; Радуйся, благорастворение воздухов и спасительный дождь благовременно той ниспославшая. Радуйся, жития чина иноческаго украшение и доброто; Радуйся, в бурю искушений и бед нас спасающая. Радуйся, помышления наши освящающая; Радуйся, сердца наши очищающая. Радуйся, душегубительный пламень страстей наших угашающая; Радуйся, мрак сатанинских искушений разсеявающая. Радуйся, житию нашему благословение Божие низводящая; Радуйся, мысленная очеса наша к горнимобителем направляющая. Радуйся, НевестоНеневестная.

Кондак 11

Пение хвалебное приносят Ти, Владычице, людиебогоспасаемаго града Архангелъска, егда град их единою в лето освящается пришествием Твоего чудотворнаго образа, и со светильники и кадильницы грядуще во сретение его, радостно вопиют Богу: Аллилуиа.

Икос 11

Светозарными лучами чудес иконы Твоя, Владычице, на святей Горе Красней немерцаемо сияет и Российскую страну нашу православную благодатно озаряет, прогоняюще всякое темное действо вражие силою Божиею, побуждающи нас пред нею Тебе, Богоизбранная Отроковице, хвалебная пения возносити: Радуйся, на пути нашего спасения неугасимыйсветильниче веры и благочестия; Радуйся, луче незаходимаго солнца. Радуйся, немерцающая во стране нашей православия звездо; Радуйся, добродетели путь освещающая. Радуйся, заре, солнце правды являющая; Радуйся, свете, мрак неведения отгоняющая. Радуйся, купинонеопалимая, Бога явившая; Радуйся, престоле огненный Вседержителя. Радуйся, чистоты сокровище; Радуйся, цвете неувядаемыя славы. Радуйся, Вышняго освященное Божественное селение; Радуйся, яко Тобою дадеся радость всем, Тя, Богородице, зовущым. Радуйся, НевестоНеневестная.

Кондак 12

Благодати Твоеяникогдажеоскудевающиянеизсякаемый источник явила еси, Богородительнице, чудотворную Твою икону, от неяжевсискорбящии и обремененнии грехи многими спасение и цельбы во вся времена приемлют и радостно о Тебе воспевают всеблагому Богу: Аллилуиа.

Икос 12

Поюще Твоя преславная чудеса, Богомати, от святыяТвоея иконы неоскудно нам подаваемая, и все упование наша на Тя, Заступнице, возлагающе, со умилением вопием Ти: Радуйся, непостыдное христиан упование в будущем веце; Радуйся, в делании заповедей Сына Твоего пребывающих спасающая. Радуйся, в животе сем нас во здравии сохраняющая; Радуйся, в страшный час смерти нас неоставляющая. Радуйся, верным рабом Твоим христианскую кончину устрояющая; Радуйся, на суде праведнем Сына Твоего верным слугам Твоим вожделенный глас Его слышати сподобляющая. Радуйся, всем хотящим спастися и в разум истины приитиБлагаяОдигитрие; Радуйся, всех, в сокрушении сердечнем кающихся грешников, несомненное спасение. Радуйся, Рождеством Твоим двери рая миру отверзшая; Радуйся, земнородных с небесными к вечному веселию сочетавшая. Радуйся, от Ангел присно воспеваемая; Радуйся, и от земнородных достойно ублажаемая. Радуйся, НевестоНеневестная.

Кондак 13

О, всепетаяМати, Пресвятая Госпоже, Дево Богородице, не отрини смиренно приносимое Тебе ныне пред чудотворным образом Твоим сие малое моление наше, презирающи бездну грехов наших: избави всех нас от бед и скорбей в животе сем и грядущиявечныяизми муки нелицемерно о Тебе вопиющих Богу: Аллилуиа.

Этот кондак читается трижды, затем икос 1 и кондак 1

 

Молитвы к пресвятой Богородице перед Ея иконой, именуемой «Грузинская»

Молитва первая

К Тебе, Богоизбранная Отроковице, Пресвятая Дево Богородице, Небесе и земли Царице, припадающе, вопием: услыши молений наших глас и не отврати лица Твоего от нас, недостойных. Приими, Всеблагая, от недостойных раб Твоих, чтущих всечестное имя Твое и с верою покланяющихся Тебе пред чудотворным Твоим образом, приносимое ныне теплое моление наше, вознеси е к Престолу Сына Твоего, Христа Бога нашего, да милостив будет к неправдам нашим и не воздаст нам по делом нашим, но да пробавит щедроты Своя. Вемы, яко несмы достойни, по грехом нашим, от Него помиловани быти, аще не Ты, Владычице, умолиши Его о нас, вся бо можеши испросити у Него, Матернее бо к Нему имаши дерзновение. Сего ради к Тебе, яко всемощней и всеблагой Заступнице нашей, прибегаем, усердно молящеся: испроси у рождшагося от Тебе Единороднаго Сына Божия, Христа Бога нашего, всем нам в святоотечестей Православней вере твердое до конца дней наших пребывание и во всех заповедех Господних неуклонное хождение, да, прочее время живота нашего поживше во всяком благочестии и чистоте, сподобимся мирныя христианския кончины и добраго ответа на страшнем Суде Сына Твоего и Бога нашего и тако достигнем, под кровом Твоея помощи, живота вечнаго во Царствии Отца светов, Емуже, купно со Единородным Его Сыном и Святым Духом, подобает слава, честь и поклонение, ныне, и присно, и во веки веков. Аминь.

Молитва  вторая

Величие и милости Твоя, Богородице, кто исповест; и чуде Твоя преславная кто воспоет; ЦерквеРоссийскияверныя чада обрадовала еси, Пречистая, безбожныя же варвары, святыню Твою презревшия посрамила еси: сохранила бо нам чудную Твою Икону, ею же недуги наша врачуются и душевные скорби исцеляются. О, Всемилостивая Владычице, Дево Богородице, не лиши нас  и ныне Твоего покрова, но молитвами Твоими присно страну  нашу и люди в мире сохраняй и  восстановлению Раифской обители способствуй. Яко Мати Святая Пресвятаго Бога, Владычице, Марие Богородице, со всеми святыми Сего   моли покоити в небесных селениях души раб Твоих, новых мучеников и исповедников Раифских: 

Архимандрита Феодосия (Лузгина)   

 уб. игумена Сергия (Гуськова)    

 уб. иеромонаха Антония (Чиркова)  

 уб. иеромонаха Иосифа (Гаврилова)

 уб. иеромонаха Варлаама (Похилюка)

 уб. иеромонаха Иова (Протопопова)

 иеромонаха Митрофана (Кириллова)

иеродиакона Иеронима (Сорокина)

иеродиакона Порфира(Советникова)

монаха Савватия (Агафонова)      

монаха Геласия (Терехина)        

монаха Нестора (Никитина)

диакона Александра Себельдина

уб. послушника Петра Тупицына

послушника Петра Ранцева

уб. Василия Гаврилова           

уб. Степана Абрамова.    

Акафист

Преподобным отцем в Синае и Раифе избиенным

Кондак 1

Преподобнии отцы наши, в Синае и Раифе избиеннии, избраннии и Духом Святым исполненнии, древле от рук варваров пострадавшии, сподобите нас нам, без притеснений живущих, но во смраде множества грехов пребывающих, молебное пение вам приносити.

Труды и страдания ваша, воспевающе, молим потемненный разум наш светом данныя вам от Бога благодати озарити, немощь нашу укрепити, да из глубины души вси купно вопием вам: Радуйтеся, преподобнии отцы, в Синае и Раифе венцы мученические восприемшии.

Икос 1

Ангело подобнаго жития желающе вся красная мира рассудно остависте; и яко сметие от себя отвергосте; себе же самех яко дар Христу Богу и приношение освятисте. Тем таковое ваше святое и богоприятное смотряще произволение, воспеваем вам сице:

Радуйтеся, отцы богоноснии, вся земная, благая и красная мира презревшии;

Радуйтеся, вся имения и вся стяжания ни во что же вменившии.

Радуйтеся, Христа всем сердцем и всею душею возлюбившии и благое иго Христово на рамена вземшии;

Радуйтеся, души и сердца ваша Создателю и Богу нашему принесшии.

Радуйтеся, житие ваше в служении Богу до мученическия скончины живота вашего проведшии;

Радуйтеся, образ самоотвержения нам показавшии.

Радуйтеся, плоти вашея со всеми страстьми ея суровии умертвители;

Радуйтеся, кротости, смирения и воздержания приснии рачители.

Радуйтеся, образом жития вашего и крепосте в христианской вере многия люди к познанию Бога приведшии;

Радуйтеся, нас, сыновей и дщерей Российских, подвигом своим на путь истины наставляющии.

Радуйтеся, преподобнии отцы, в Синае и Раифе венцы мученическия восприемшии.

Кондак 2

Преподобнии отцы, в великую пустыню Египетскую вселилися есте и на земле сей, явлением купины неопалимой освященной, в молитвах и трудех подвизалися есте. Поминающее источника воднаго чудесное из камене изведение, еже по молитве святаго пророка Божия Моисея, тамо бысть, источники слез покаяния во очесех ваших обрели есте, благодарственно поюще Богу: Аллилуия.

Икос 2

Разумением Божия изволения желанием сердца вашего в землю Синайскую благополучно достигнувше, великими труды вашими зной и глад претерпевающе, обители славныя в Синае и Раифе воздвигли есте. Многая тамо духовная и благая сокровища стяжавше, с велиим тщанием Божия веления исполнили есте, сего ради вопием вам таковая:

Радуйтеся, в далечайшую страну обретения ради иноческаго жития нескорбно удалившии;

Радуйтеся, храмы Божия тамо воздвигнувшии.

Радуйтеся, себе Богу всесовершенно предавшии;

Радуйтеся, не двема господинома, Богу и мамоне, но Единому Богу точию работать восхотевшии;

Радуйтеся, воини Царя Небеснаго, купли житейския отвергшии, да Ему угодны будете.

Радуйтеся, многим своим любомудрым житием образом поста и молитвы явившиися;

Радуйтеся, безответным Господа ради послушанием и непрестанными иноческими труды и бдениими благодать Божию стяжавшии;

Радуйтеся, яко в иночество многих делом и словом привлекли есте;

Радуйтеся, яко бдение и молитву в часть желанную избрали есте.

Радуйтеся, яко собранную братию духовною сладостию изобильно насытили и в добродетелех укрепили есте.

Радуйтеся, преподобнии отцы, в Синае и Раифе венцы мученические восприемшии.

Кондак 3

Силою Божиею Моисей, народ Израиля от плена египетскаго избавивый, приведе его к горе Синай. Тамо скорбя душею о гресех людских, взыде на гору слезно моляще Господа о вразумлении отшедших от Него. И даде Господь Моисею скрижали Завета, Моисей же сниде ко Израилю и учаще его Закону Божию. Преподобнии же отцы в Синае и Раифе Свет Евангелия варваром принесоша. Уча и вразумляюще люди, ко Господу многих приведоша, иже радостно пояху: Аллилуия.

Икос 3

Имущее мудрость учения Христова, преподобнии отцы Синайстии и Раифстии, в пещерах и храмах Богу день и ночь служасте и неверных просвещасте, многих от мрака бесовскаго и вечныя смерти спасающе. Почитюще труды ваша, преподобнии, радостно поем:

Радуйтеся, труды мирския на ангельския заменившии;

Радуйтеся, Единаго Христа от сердца возлюбившии.

Радуйтеся, слово Христово варваром принесшии;

Радуйтеся, готовии споспешницы ищущих вечнаго спасения и истиннаго просвещения.

Радуйтеся, идолов почитавших ко Христу обратившии;

Радуйтеся, лучи Божественнаго света посреде тьмы зловерия.

Радуйтеся, совершением заповедей любовь Божию стяжавшии;

Радуйтеся, постом, молитвою и сердца изволением себе в жилище Божественной благодати приуготовившии.

Радуйтеся, ближних яко самех себе любити наставляющии;

Радуйтеся, образи кротости духовныя.

Радуйтеся, преподобнии отцы, в Синае и Раифе венцы мученическия венцы восприемшии.

Кондак 4

Бури житейских искушений избегающее, силою Божею храними и укрепляеми, от силы в силу восходили есте, преподобнии, и благодатных даров от Господа сподобилися есте: молитвою вашею немощи врачевати, душевныя скорби исцеляти, недужныя от одра болезни воздвизати. Яже видяще восславим людие Господа Всемогущаго, вопияше ему: Аллилуия.

Икос 4

Слышавшее слово Божие узкий путь послушания избрали есте: отсечением воли своея, постоянною молитвою, чрева утеснением, осмеяний приятием и поруганий досаждением терпением, подвизалися есте. Темже образ совершеннаго отречения явившие, и любовь небесную приумножившее, от Бога благодать врачевания получили есте, и тем любовь к ближним изливающии. Ведуще убо силу молитв ваших, дерзаем вопити вам:

Радуйтеся, преподобнии, во Едином Бозе всю сладость жития полагающии;

Радуйтеся, устнами иноческими хвалу Богови поющии.

Радуйтеся, душегубительный пламень страстей своих угасившии;

Радуйтеся, силою молитвы диавольское искушение и напасти препобедившии.

Радуйтеся, чина иноческаго украшение и доброто;

Радуйтеся, тихое пустынножителей веселие.

Радуйтеся, алчущия и убогия возлагати на Господа печаль призывающии;

Радуйтеся, силою Божией многая чудеса содеявшии.

Радуйтеся от целити всяк недуг и всяку болезнь от Господа дар приявши;

Радуйтеся, дерзновенною молитвою вашею недужныя исцеляющии.

Радуйтеся, преподобнии отцы в Синае и Раифе венцы мученическия восприемшии.

Кондак 5

Богодарованною силою свыше, преподобнии отцы, и крепостию вашею во исповедании веры в Единаго Бога обезсилили есте силы бесовския, и благодать испросевши словом Божиим бесы изгоняти и недуги исцеляти, радостно возописте Богу : Аллилуия.

Икос 5

Проповедницы веры православныя и благочестия ревнители, богомудрии отцы, в Синае и Раифе людем послужившии, святыми молитвами своими демонов победившии. Почитающе подвиги ваша, с умилением взываем:

Радуйтеся, преподобнии, блуждающим во тьме силу Божией благодати показавшии;

Радуйтеся, обуреваемых пристанище.

Радуйтеся, над всеми кознями вражескими восторжествовавшии;

Радуйтеся, бесов от человеков прогонителие.

Радуйтеся, идольскаго служения потребителие;

Радуйтеся, идольскую прелесть низложившии.

Радуйтеся, молитвою к Богу укрепившии и благословение вечное от Него приемшии;

Радуйтеся, веры Христовы непобедимии исповедницы.

Радуйтеся, истиннаго благочестия насадители;

Радуйтеся, земли Синайской похвало и радование.

Радуйтеся, преподобнии отцы, в Синае и Раифе венцы мученическия восприемшии.

Кондак 6

Житие пустынное зноя ради и скудости пропитания жестоко есть; тако же от зверей хищных безмолвницы досаждение имут. Кольми ужаснееши суть разбойницы, противу святынь христианских и служителей Божиих озлобленнии. Грабляху и разоряху обители иноческия, иноки же истязанием и смерти предаваху. Преподобнии же отцы защищение свое в Господе возложивше, возношаху Ему пение: Аллилуия.

Икос 6

Возсиявшии в Синае и Раифе преподобнии отцы тяжкими невзгодами пустыни Египетския пренебрегоща, непрестанно славяще Бога, отсекоша волю свою и предаша себе воли Бога Защитника их и Хранителя, житие свое в молитве и покаянии проводяще. Мы же воспевающе смирение их поем:

Радуйтеся, преподобнии отцы, отвергшиися себе и волю свою воле Божией покорившии;

Радуйтеся, дольная и красная мира презревшии.

Радуйтеся, священными обеты волю свою связавшии;

Радуйтеся, силу заповеди Христовой, яже о любви ко врагом премудро уразумевавшии.

Радуйтеся, плоть презревшии, о душе безсмертной прилежавшии;

Радуйтеся, наставницы наши в подвизе удаления мира.

Радуйтеся, злобы неверных не устрашившии;

Радуйтеся, кротости Христовы подражатели.

Радуйтеся, звери видимыя словом любве укрощавшии;

Радуйтеся, драконов невидимых силою креста сокрушавшии.

Радуйтеся, преподобнии отцы в Синае и Раифе венцы мученические восприемшии.

Кондак 7

Хотящее варвари именем Влеммиане нападсти на землю Синайскую, людий градов Хорив, Кадор и Тефрофиле пребивша, жен же и детей яко рабов взяша. Такоже избиваху иноки многи, в безмолвии и затворе, в уединенных пещерах, житие свое проводивших. Тако мечами и стрелами тридесять и осмь инок умертвиши. Малое же число инок спасся, благодарственно воспевающе Богу: Аллилуия.

Икос 7

Новым попущением Божиим пострада земля Синайская от варвар безбожных, многих, инок в затворе пребывавших, мечами посекоша. Тии же, упование на Господа возложивше, никакоже противляхуся. Воспевающе мученическия подвиги ваша, преподобнии отцы, поем:

Радуйтеся, преподобнии отцы живот свои за Господа положившии;

Радуйтеся, в вечное Его царствие с Ним востекшии.

Радуйтеся, смирения и кротости образи;

Радуйтеся варвар нечестивых никако убоявшиися.

Радуйтеся, люди мудрыми глаголы оставити языческое нечестие поучавшии;

Радуйтеся, восприятии свет христианскаго благочестия увещевшии.

Радуйтеся преподобнии отцы, вослед за Христом на смерть шедшии и варварскими мечами посекаемии, тем же венцы мученическия восприявшии;

Радуйтеся, всеславно пожившии и яко агнцы умершии, в скиниях бо первородных вселистеся.

Радуйтеся: надгробными молитвами мученики, от варвар посеченныя, в последний путь проводившии;

Радуйтеся, преподобнии, любовь вашу ко ближним до последняго издыхания показавшии.

Радуйтеся, преподобнии отцы, в Синае и Раифе венцы мученические восприемшии.

Кондак 8

Разбойныя помышления имуще, текоша варвари, аки волци алчущии, ко обители Синайской. Игумен же обители, преподобный Моисей, зва я насельники ея на молитву усердную ко Господу и Спасителю. Господь, по молитвам иноческим, поругания сего святаго места не попусти, и низведе огнь велий на гору Синайскую со трусом страшным и дыма исхождением. Варвари ужасом обуяннии, бежаху от обители. Спасеннии же иноцы воспеваше Богу: Аллилуия.

Икос 8

Вси иноцы горы Синайския яко овчата кроткая явишася, и возложивше на Господа упование свое, со тщанием взываху к Богу: милостив буди нам грешным”. Мы же, умильне взирающе на пресветлый образ кротости вашея во обличение жестокосердия нашего, взываем:

Радуйтеся, преподобнии отцы жизнь свою яко жертву Господеви предавшии;

Радуйтеся, за вся Господа благодарящии.

Радуйтеся, верность святыне христианской паче жизни положившие;

Радуйтеся, через все житие свое Единому Богу послужившии.

Радуйтеся, игумену своему яко наставнику со смирением внимавшии;
 Радуйтеся, образ послушания и смирения показавшии.

Радуйтеся, веры Христовой непобедимыя исповедницы;

Радуйтеся, телеса ваша за Христа мученической смерти предавшии.

Радуйтеся, друзи Христовы, с радостию страдания смертная за Него претерпевшии;

Радуйтеся, небесная благая в воздаяние получившии.

Радуйтеся, преподобнии отцы, в Синае и Раифе венцы мученические восприемшии.

Кондак 9

Бе в пустыни Раифской, в двух днях пути от Синая удаленной, обитель славная. Во дни оны прииде корабль от земли Египетская. В нем же и триста свирепых варвар привезошася. Мирныя жители раифския убивше, текаша варвари к обители. Настоятель же ея преподобный Павел, восстав рече братии: да не убоимся и не восскорбим страха ради варварскаго. Радостно приимем смерть, Господь же приведет нас во царствие Свое. И паки рече: Господи Иисусе Христе, упование и помощь наша, не забуди нас недостойных рабов Твоих и приими жизнь нашу яко жертву благоприятную. И возопиша иноцы: Аминь.

И се глас с небес бысть: “Придите ко Мне, вси труждающиися и обременении, и Аз упокою вы”. Умиленно возопиша вси ко Господу: Аллилуия.

Икос 9

Витийствующий язык человечь изрещи не возможет како злобни разбойницы быша, никто же бо из людей обрете спасени, но бысть посечен мечем, душу свою Господу предавая. Господь же прия души невинныя и упокои я в селениих праведных. Мы же кротость и воспевающе зовем:

Радуйтеся, преподобнии отцы, прещений лютых не убоявшиися;

Радуйтеся, ангельскою непорочностию и мученичеством украшеннии.

Радуйтеся, Господу любовь свою показавшии;

Радуйтеся, Христа упованием своим именующии.

Радуйтеся, единаго Бога крепостию своею нарицающии;

Радуйтеся, собеседницы невещественных ангелов.

Радуйтеся, добровольно в руки мучителей себе предававшии;

Радуйтеся, волею своею на страдания шедшии.

Радуйтеся, во всем упование наше на Бога возлагати нас научающии;

Радуйтеся, в молитвах к Богу теплыя о нас предстатели.

Радуйтеся преподобнии отцы, в Синае и Раифе венцы мученические восприемшии

Кондак 10

Безбожнии разбойницы чрез ограду обители прелезше течаху в храм Божий. Старца Иеремию пытаху: “ где настоятель ваш есть?” Иеремия же молчаше и убиен бысть. Еда же прииде настоятель, преподобный Павел, разбойницы бысть приступивше к нему вопросиша “где сокровища обители суть?” Отвечаша же преподобный “ничтоже имам разве ризы ветхия”. Варвари, бесовскою злобою распаляеми, преподобнаго рассекоша надвое и на иныя иноки нападше, мечами всех посекошам, не оборетше же желаемаго, обитель оставиша. Един же от инок посреде ваий финиковых, у стены лежащих, сокрывый бысть злаго деяния свидетель и поведа людем всем, како презревше суету мирскую, умероша тии во имя Господне, воспевающе Ему: Аллилуия.

Икос 10

Святии мученици, подвиги своя кровию мученическою запечатлевше, поистине блаженства в Царствии Небеснем удостоишася, такожде великия славы и чести. Мы же страданием их поклоняющеся воспоим:

Радуйтеся, преподобнии отцы, мира сего вся красная презревшии;

Радуйтеся, слезами покаяния души своя оросившии,

Радуйтеся, смертный свой час без страха и скорби приявшии;

Радуйтеся, за Христа жизни своея не пощадившии.

Радуйтеся, в мучениих ради имени Господа скончавшиися;

Радуйтеся, до последняго часа Бога за вся благодарившии.

Радуйтеся, великую славу у Господа заслужившии;

Радуйтеся, мзду велию за ваша иноческия злострадания от Всещедраго Мздовоздаятеля восприемшии.

Радуйтеся, обитель подвигом своим освятившии;

Радуйтеся, в небесная жилища чрез страдания вшедшии.

Радуйтеся, преподобнии отцы, в Синае и Раифе венцы мученическия восприемшии.

Кондак 11

Приидоша варвари ко брегу морскому и узреша корабль свой о скалы разбиенный, плененный бо кормчий, убив стражы и вервии корабельные обрезав, бежа от них. Корабль же, свободу обрет, волнами унесен бысть ко камением великим и погибе. Разбойницы зело озлоблени бывшее убиваху плененныя. В день же той приидоша воини князя земли той и избиша разбойники. Тако погибли погубити иноков тщащийся. Спасенние же людие купно со воины погребоша невинно убиенных. Новый труд и новый подвиг по возвращении в обитель вашу восприяли есте, отцы преподобнии, на устроение молитвеннаго храма неленостно устремистеся, Единому Богу выну воспевающе: Аллилуия.

Икос 11

Светозарною звездою были еси богомудрии отцы в Синае и Раифе избиении, тщание и попечение имели есте, выну о еже Творца в душах и телесех ваших прославити. Такожде молистеся за творящих вам напасть и изгоняющих вы. Нас же от всех прегрешений и всякия скверны молитвами вашими очистите, и приимите пение, любезно нами приносимое:

Радуйтеся, постницы, вземшии на рамо крест свой и тесным путем вслед за Христом шедшии;

Радуйтеся, яко в Синае и Раифе вами свет Христов возсия.

Радуйтеся, досточудный образе терпения;

Радуйтеся, лишении телесными многая, блага духовная собравшия

Радуйтеся, образе христианскаго упования и любве, нам данный;

Радуйтеся, кротостию Давидовой враги своя победившии.

Радуйтеся, к сиянию постничества обители святыя созидавшии;

Радуйтеся, смирения Господня подражатели.

Радуйтеся, внутреннюю красотою Креста Христова восхищеннии;

Радуйтеся, наставницы наши радость во скорбех находящии.

Радуйтеся, преподобнии отцы, в Синае и Раифе венцы мученические восприемшии

Кондак 12

Многим летом минувшим, паки нападоша безбожнии на обители Синайския, притесняху я, иноки же истязаху и убиваху. Обаче Господь милостию Своею не допусти обителем святым погибнуть, яко до сего дне на Синае и Раифе иноком многим подвизатися, ангелоподобным житием своим нам грешным, образ являюще.

Прославляюще Господа Милостиваго, спасающа верныя Ему от погибели, и поклоненяющеся Ему, воспеваем: Аллилуия.

Икос 12

Поем вас, преподобнии отцы, в пустыни яко светило многосветлое возсиявшии, многими добродетельми души ваша обогатившии, и многия обители на славословие Божие устроившии. Почитающе труды и мученическую кончину вашу со дерзновением вопием:

Радуйтеся, подвижницы веры, угождение Богу от юности предизбравшии;

Радуйтеся, путеводители, правую стезю к вечному спасению нам показавшии.

Радуйтеся, в селениях праведных на земле вселившии;

Радуйтеся, яко путь правый в Царствие Божие обрели есте.

Радуйтеся, обителей многоплодных основатели;

Радуйтеся, пустыни просвещение и украшение.

Радуйтеся, преподобных отцев похвало и мучеников славо, при кончине венец мучения приявшии;

Радуйтеся, по смерти вашей образ подражания нам явившии.

Радуйтеся, в сонме мученик благочестно восприятии яко много Христа ради претерпевшии;

Радуйтеся, со всеми святыми добре Богу угодившими, участие и наследие обретшии.

Радуйтеся, преподобнии отцы в Синае и Раифе венцы мученические восприемшии.

Кондак 13

О преблаженнии и всякия чести достойнии, отцы Раифской и Синайской обителей, мученически пострадавшии, малое сие моление, нами недостойными с почитанием вам приносимое, любезно приимите; и молитвами вашими ко Господу обители православныя на земли Российстей защитите. Нас же с сыновнею любовию к вам притекающих, от всяких бед, скорбей и напастей свободите, да выну благодарно поем о вас Богу: Аллилуия.

Кондак сей глаголи трижды, паки Икос 1 “Ангелом подобнаго желающее…” и такоже Кондак 1 “Преподобнии отцы наши в Синае и Раифе.

 

Молитва Преподобным отцем, в Синае и Раифе избиенным

Преподобнии и богоноснии отцы наши в Синае и Раифе избиеннии, к вам мы, грешнии, страдания ваша почитающе, смиренно прибегаем, просим помощи и заступления, в бездне зловерия и нечистоты пребывающии. Вемы бо, преподобнии отцы, труды ваши великия в пустынех Синайской и Раифской, имиже веру христианскую в пустынех оных насадисте. Явилися бо есте иноком образ пустынным житием, безмолвия рачители, страстей искоренители. Даде же вам Господь велию благодать больных исцеляти, бесов изгоняти, молитвою врагов отгоняти.

Сострадаем вам, от нашествия варвар пострадавшим и многих братий своих убиенными зревшим и погребшим. Почитаем наставников ваших преподобных отцев Моисея и Павла, своими молитвами ко Всевышнему в час погибели души ваша укрепивших, купно с братией, уповающе на милосердие Божие, воспевающих: “Чашу спасения приимем, и имя Господне призовем”. Аще и попущением Божиим от разбойник нападения претерпесте, многия беды обителем принесшими, но по изгнании их, обители своя не оставили есте, и рачением вашим, новыми труды и подвиги новыя храмы и обители воздвигосте, тем любовь преизобильну ко Богу показавше.

Веруем, яко велие дерзновение имате ко Господу и яко много может предстательство ваше пред Престолом благости Его. Молим испросити нам в вере православной крепость, в делах милосердия преспеяние, любовь к ближним нелицемерну, в искушенииих мужество, в злостраданиих терпение. Призрите милостиво на молящихся во святем храме сем, да благая желания их исполните во славу дивнаго во святыых Своих в Троице славима Бога, Отца и Сына и Святаго Духа. Аминь.

 

Акафист

Преподобным отцем, новомученикам Раифским

Кондак 1

Преподобнии отцы, новомученицы Раифстии, во обитель по воли Божией пришедшии не ктому человеческим похотем, но по воли Божией прочее во плоти жити время и правды ради души своя положити. Песньми восхваляем вас, смерть Христа Бога нашего ради приявшии и тем силу веры христианския показавшии. Любовию поем вам: Радуйтеся, преподобнии отцы, новомученицы Раифстии.

Икос 1

Ангелоподобное житие возлюбивше, преподобнии, в обитель Раифскую вселистеся. Мира бегающе и вся красная его оставивше, труды иноческия на себе возложисте и, в самое сие тщание все привнесше, тем прилежание ко Христу показасте. Сего ради, вас прославляюще, поем:

Радуйтеся, преподобнии, домы и вся стяжания своя оставившии;

Радуйтеся, Единаго Бога возлюбившии.

Радуйтеся, яко красная мира сего ни во что же вменившии;

Радуйтеся, в тиши лесной спасение искавшии.

Радуйтеся, в чистоте души своя сохранившии;

Радуйтеся, всякия правды исполнению послужившии.

Радуйтеся, себе Богу всесовершенно предавшии;

Радуйтеся, не двема господинома, Богу и мамоне, но Богу точию работати восхотевшии.

Радуйтеся, преподобнии отцы, новомученицы Раифстии.

Кондак 2

Разумением Божия изволения во обитель Раифскую вселилися есте, лесами густыми сокрытую, но посреде иных обителей Российских славную чрез икону чудотворную Божия Матери, “Грузинская” именуемую. Мнози бо болящии и немощнии во обитель приходяще, по молитве пред образом Пречистыя Девы исцеляхуся. Иноцы, пение умильное пред иконою сею возносяще, в вере православной укрепляхуся, Богу пение благодарственное приносяще: Аллилуиа.

Икос 2

Видяще мира суету, преподобнии отцы, домы и имения своя остависте и в обитель иноческую вселистеся. Многая тамо духовная и благая сокровища стяжавше, с велиею радостию заповеди Божия исполняли есте. Чудотворный образ Пресвятыя Богородицы почитающе, молебное пение Ей возносили есте. Мы же, радующеся о сем, поем:

Радуйтеся, ко Иисусу Христу с любовию притекавшии и образ Его Раифский “Спас Нерукотворный” лобызавшии;

Радуйтеся, в делании заповедей Спасителя пребывавшии.

Радуйтеся, чудотворному образу Пресвятыя Богородицы “Грузинския” поклонявшиися;

Радуйтеся, моления ко сему образу с верою непостыдною приносившии.

Радуйтеся, дивнии подражателие совершенства Отца нашего Небеснаго;

Радуйтеся, труды и молитвы выну творившии.

Радуйтеся, кротость, смирение и бдение имевшии.

Радуйтеся, сущии в Дусе, присно духовная мудрствующии.

Радуйтеся, преподобнии отцы, новомученицы Раифстии.

Кондак 3

Силою Вышняго, отцы преподобнии, во обители обеты иноческия исполняюще, труды телесными и душевными Господу послужисте, наипаче же Слово Божие изучисте и паломники во обители сей  глаголом Божественным научисте. На всякое лето чудотворную икону Пресвятыя Богородицы в град Свияжск крестным ходом приношасте, благодарственно воспевающе: Аллилуиа.

Икос 3

Имуще, преподобнии отцы, велию любовь Божию, телеса ваша яко жертву живу, благоугодную Богу представисте, служения словеснаго ради. Людие же, дела ваша добрая видевше, Бога, Иже на небеси, восхваляху. Мы же, о сем ликовствующе, поем:

Радуйтеся, Христову веру в стране нашей утверждавшии;

Радуйтеся, таинству спасения людий российских послужившии.

Радуйтеся, во Пресвятей Богородице к небесному отечеству добре нас Направляющую видевшии;

Радуйтеся, яко преблазии и добрии наставницы человеков бесте.

Радуйтеся, обитель Раифскую труды вашими преукрасившии;

Радуйтеся, христоподражательными нравы вашими ленивыя подвигнувшии.

Радуйтеся, устнами православными хвалу Богови совершавшии;

Радуйтеся, чистоты душевныя и телесныя усерднии хранителие;

Радуйтеся, преподобнии отцы, новомученицы Раифстии.

Кондак 4

Бурею зла и нечестия, яко наказанием, от Бога исходящим, по наущению вражию страна Российская во мрак греховный низвержена бысть. Мнози бо людие российстии обеты крещения пренебрегоша и, заповеди Божии оставивше, на имя Господне хулу рекоша, храмы же Божии и обители иноческия разоряху, священники же и иноки оскорбляху и изгоняху, иныя же убиваху. Стадо же малое верных, ко Господу вся упование возложив, пояше Ему: Аллилуиа.

Икос 4

Слышавшее людие российстии безбожников льщения лютая, сумнении поколебашася и веру истинную оставиша. Врази же православия, алчностию и завистию движимии, храмы Божия грабляху и оскверняху. Христолюбцев из домов изгоняюще, во узилища ввергаху мучений лютых ради. Мы же, память страстотерпцев почитающе, поем:

Радуйтеся, Пресвятыя Богородицы заступлением печаль свою в радость претворившии;

Радуйтеся, мысленная очеса ваша к горним обителем направлявшии.

Радуйтеся, вся похоти плотския Бога ради умертвившии;

Радуйтеся, козни лукаваго силою Божиею победившии.

Радуйтеся, тленная на нетленная пременившии;

Радуйтеся, сокровенным хлебом небесным питавшиися.

Радуйтеся, мирския суеты отрешившиися;

Радуйтеся, небеснаго отечества пламенно возжелавшии.

Радуйтеся, преподобнии отцы, новомученицы Раифстии.

Кондак 5

Божиим попущением, яко хищницы лютии, слуги власти безбожныя во обитель Раифскую приидоша и по храмам растекошася, злата и сребра алчуще, иконы святыя разоряху, сосуды же священныя изымаху, иноки же из келлий изгоняху. Скорбь велия наста во обители, вси бо разумеша, яко прииде конец ея. Нечестивии безбожницы, храмы Божия затворивше, точию един от них на потребу инок оставиша. Братия же, шедше во оный, пояху: Аллилуиа.

Икос 5

Видим, преблаженнии и богоноснии отцы, яко все ваше тщание и попечение о том бысть, еже Творца в душах и телесех ваших прославити. И в сем благом изволении, и в подвизе поношения от безбожных, и в страданиях ваших, силою свыше укрепленнии, толико преуспесте; яко вся возмогосте о укрепляющем вас Бозе, чесо ради таковое вам похваление воздаем ныне:

Радуйтеся, Единаго Господа возлюбившии и к Нему очеса своя выну имевшии;

Радуйтеся, во вся дни живота своего упование свое в Нем утверждавшии.

Радуйтеся, человеков спасения ради всем благовестие Христово приносившии;

Радуйтеся, друг другу работавшии.

Радуйтеся, кротости и смирения преисполненнии;

Радуйтеся, притекающим к вам в словесех любве ободрение и утешение подававшии.

Радуйтеся, житием своим любомудрым образ поста и молитвы явившии;

Радуйтеся, яко в иночество многих делом и словом привлекли есте.

Радуйтеся, преподобнии отцы, новомученицы Раифстии.

Кондак 6

Проповедницы богоноснии бывше, иноци раифстии, из обители изгнаннии, в веси окрестныя вселишася. Тамо пропитания ради скудости и хлада болезньми страдаху, обаче, волю Божию на то разумеюще, никакоже роптаху. Всем себе поработивше, всем беша вся, да всяко спасутся неции, словом Божиим люди в весех и на путех просвещающе. Преподобнии отцы за крест, им низпосланный, Богу благодарственное пение пояху: Аллилуиа.

Икос 6

Возсиявше во тьме гонения, иноци, безбожниками изгнаннии, попечения о людех российских не оставиша. И даде Господь рабом Своим силу со всяким дерзновением глаголати слово Свое. Отцы яко заповедь глаголы Господни прияша: “Шедше научите вся языки, учаще их блюсти вся, елика заповедах вам”. Мы же, усердие велие ваше славяще, поем:

Радуйтеся, люди заповедем Божиим научавшии и на путь истины наставлявшии;

Радуйтеся, блазии раби и добрии делателие винограда Христова.

Радуйтеся, алчущия и убогия на Господа печаль возлагати призывавшии;

Радуйтеся, устнами иноческими хвалу Богови певшии.

Радуйтеся,  искушений и соблазнов от диавола избегнувшии;

Радуйтеся, христианского рода украшение.

Радуйтеся, образе истиннаго смирения;

Радуйтеся, зерцало совершеннаго терпения.

Радуйтеся, преподобнии отцы, новомученицы Раифстии.

Кондак 7

Хотяще в таине смирения соблюстися, яко светильницы под спудом, иноцы раифстии купно со иноки иных обителей затворенных, людем свет разумения заповедей Божиих и глаголов Церкви православныя приношаху, то же потщашася благовестити, идеже не именовася Христос. Сами же образом нищеты и смирения бяху. Поучение же Евангелия: “Тако да просветится свет ваш пред человеки, яко да видят ваша добрая дела, и прославят Отца вашего, Иже на небесех”, - исполняюще, пояху Всевышнему: Аллилуиа.

Икос 7

Новое показасте дело, преподобнии отцы Раифстии, во изгнании сущии, моляще непрестанно о низпослании стране Российстей от бесовскаго наваждения спасения и о низпослании благодати Божией в послушание веры во всех языцех о имени Его, смиренномудрием же друг друга больша себе творяще. Благоприятное ваше произволение разсмотряюще, сицевое вам приносим пение:

Радуйтеся, пред лицем Божиим яко раби пред Господем ходившии;

Радуйтеся, совершеннаго послушания исполненнии.

Радуйтеся, споспешницы ищущих вечнаго спасения и истиннаго просвещения готовии;

Радуйтеся, Божественнаго света лучи, посреде тьмы зловерия сиявшии.

Радуйтеся, благое иго Христово на себе восприемшии;

Радуйтеся, исповедницы веры во Христа неустрашимии.

Радуйтеся, прошения ваша молитвою и молением со благо-дарением сказующии;

Радуйтеся, кротостию вашею вся люди умиротворявшии.

Радуйтеся, преподобнии отцы, новомученицы Раифстии.

Кондак 8

День поминовения преподобных отцев, в Синае и Раифе избиенных, наступи, воньже множество инок и священник из обителей и храмов, властьми затворенных, притекше, Литургию и поминовение убиенных сотвориша купно. Еще же им служащим, се народ и стражницы приступиша ко священником, хотяще взяти я. Они же отвещаша: “Яко на разбойники ли изыдосте на ны со оружием?” Стражницы же, емше я, ведоша во град, идеже в темнице затвориша. Плененнии никако сопротивляхуся, воспевающе Богу: Аллилуиа.

Икос 8

Всем преподобным отцем, в Синае и Раифе избиенным, вечную память поюще, иноцы и множество людии православных в малом храме Раифской обители собрашася, Господа моляще о мире и спасении душ христианских. И се народ, силою безбожною ведомый, прииде и разори богослужение, священники же плениша и в темницу отведоша. Смирение ваше, отцы преподобнии, почитающе, поем:

Радуйтеся, житие и страдания преподобных отцев, в Синае и Раифе избиенных, наследовавшии;

Радуйтеся, почитание оных отцев до последняго часа хранившии.

Радуйтеся, преподобным отцем, в Синае и Раифе избиенным, молебное служение сотворившии;

Радуйтеся, память убиенных отцев почитающии.

Радуйтеся, не о своих си кииждо, но о пользе ближних пекшиися;

Радуйтеся, яже во Христе Иисусе выну мудрствовавшии.

Радуйтеся, вся без роптания и размышления творящии;

Радуйтеся, яко светила посреде рода строптива и развращенна в мире явившиися.

Радуйтеся, преподобнии отцы, новомученицы Раифстии.

Кондак 9

Преподобнии отцы во узилище ввержени быша, упованием радующеся, скорби терпяще, в молитвах пребывающе. Стражницы же нечестивии биша я и истязаша. Судия же вопрошаше: “Кто господин и наставник вам есть?” Непреклонно отвещаша ему: “Иисуса Христа Единаго Господина и Наставника имамы”. Судия же зело озлоблен бысть и повеле невинныя со тщанием истязати. Преподобнии же отцы, волю Господню во всем разумеюще, пояху Ему: Аллилуиа.

Икос 9

Ветия многовещанныя не возмогут по достоянию воспети страдания ваша за Христа, преподобнии. В темнице заключеннии преподобнии отцы никако роптаху, поминающе глаголы Господни: “Блажени есте, егда поносят вам, и ижденут, и рекут всяк зол глагол, на вы лжуще Мене ради, радуйтеся и веселитеся, яко мзда ваша многа на небесех”. Мы же, сии глаголы почитающе, поем:

Радуйтеся, яко Христу сострадавшии;

Радуйтеся, за Христа узы и темницу приявшии.

Радуйтеся, яко в житии сем ближния своя самоотверженно возлюбили есте;

Радуйтеся, яко правилом веры благочестивыя явилися есте.

Радуйтеся, Христу Богу в кротости и смирении подражавшии;

Радуйтеся, враги ваша незлобием простившии.

Радуйтеся, яко день и нощь в заповедех Иисуса Христа поучалися есте;

Радуйтеся, яко единодушно в молитве и молении претерпели есте.

Радуйтеся, преподобнии отцы, новомученицы Раифстии.

Кондак 10

Дню судилища безбожнаго пришедшу, судия жестоковыйный, ни единаго же свидетеля обрет, ничтоже сумняся рече: “Смерти  предани да  будут”, - и никто же возможе защитити я. Преподобныя отцы пояша и паки в темницу отведоша, зане праведных мучениими нечестивии не насытишася. Преподобнии же отцы, казнь яко крест Господень восприемше, пояху Ему: Аллилуиа.

Икос 10

Преподобнии отцы Раифстии, судилищем неправедным обвиненнии, все упование ваше на Господа возложисте, почитающе смерть яко страстем Господним следование, благодаристе Его, сподобившаго вас чашу Его пити, Иисуса же Христа молисте: “Помяни нас, Господи, во Царствии Своем”. Ко Господу прилежание ваше восхваляюще, поем:

Радуйтеся, венцы исповедников Христовых стяжавшии;

Радуйтеся, за христианы души своя положившии.

Радуйтеся, вольная страдания за имя Христово претерпевшии;

Радуйтеся, себе отвергшиися, волю же свою воли Божией покорившии.

Радуйтеся, душами в Сион Горний востекшии;

Радуйтеся, яко тамо предстоите, о всех нас к Богу тепло ходатайствующии.

Радуйтеся, душам вашим спасения на праведном судищи Божиим ожидающии;

Радуйтеся, веления нечестивых презревшии.

Радуйтеся, преподобнии отцы, новомученицы Раифстии.

Кондак 11

Днем пятнадесяти прошедшим, преподобныя мученики на казнь поведоша. Тии же, благодать от Господа получивше, к часу смертному пришли суть, Господа моляще о приятии душ их с миром. Тако отцы преподобнии в месте уединеннем казнени быша, в смертный свой час молитву Господню устнама глаголюще. Не вемы мы, грешнии, идеже гробы ваша суть. Вы же, селения Господня ожидающе, взывали есте: Аллилуия.

Икос 11

Светоподательныя свещи бесте во страданиих ваших, святии мученицы, озаряюще светом сердца нечестивая, яко да обрящут Единаго Господа. Сего ради умильно восклицаем вам:

Радуйтеся, гонения и смерть от нечестивых претерпевшии;

Радуйтеся, от обители земныя во обитель небесную прешедшии.

Радуйтеся, молитвою к Богу укрепившиися и благословение вечное от Него восприемшии;

Радуйтеся, веры Христовой непобедимии исповедницы.

Радуйтеся, подвижницы веры, угождение Богу от юности предызбравшии;

Радуйтеся, путеводителие, правую стезю к вечному спасению нам показавшии.

Радуйтеся, смертный свой час без страха и скорби приявшии;

Радуйтеся, Бога до последняго часа за вся благодарившии.

Радуйтеся, преподобнии отцы, новомученицы Раифстии.

Кондак 12

Благодать дати восхотев, внят Господь молитвам рабов Своих и крепость веры православных людий испытав, вразуми правителей российских еже на христиан гонения прекратити. Тако трудами наместника и братии ея обитель Раифская паки восста. Крест же Господень над обителию возсия и образ Пресвятыя Богородицы “Грузинския” чудотворный в удел свой возвратися. В день сей трудников Христовых благодаряще, воспеваем Спасителю нашему: Аллилуиа.

Икос 12

Поем, преподобнии отцы, страдания ваша, яко кровь, из ран ваших истекшая, принесе плоды пречудныя, имиже обитель Раифская освящается и людий множества многа, в обитель Раифскую приходящая, светом Христовым просвещаются. Мы же, сие о людех попечение зряще, вопием:

Радуйтеся, в сонме мученик благочестно восприятии, яко много Христа ради претерпевшии;

Радуйтеся, со всеми святыми добре Богу угодившии и наследие нетленное обретшии.

Радуйтеся, обители Раифския похвало и украшение;

Радуйтеся, наставницы иноков многомудрии.

Радуйтеся, яко наследницы ваши Раифскую обитель из руин подъяша;

Радуйтеся, яко обитель Раифская паче прежняго возвеличися.

Радуйтеся, нас, сынов и дщерей Российских, подвигом своим на путь истины наставляющии;

Радуйтеся, образ самоотвержения нам показавшии.

Радуйтеся, преподобнии отцы, новомученицы Раифстии.

Кондак 13

О новомученицы Раифстии, в чертозех небесных водворившиися, приимите сие малое от любви нашея почитание и благохваление, вам приносимое. Молитвами вашими пред престолом Вседержителя испросите обители Раифской, подвигами вашими прославленной, процветание. Нас же, грешных, свободите от духа гордости и праздности, от бед и немощей, да сподобимся купно с вами во веки пети: Аллилуиа.

Кондак сей глаголи трижды. Паки Икос 1 “Ангелоподобное житие возлюбивше..” и такоже Кондак 1 “Преподобнии отцы, новомученицы Раифстии, песньми восхваляем вас”.

 

Молитва ко Преподобным отцем, новомученикам Раифским

О преподобнии и богоноснии отцы наши, в Раифской обители мученически пострадавшии, к вам мы, грешнии, труды ваша почитающе, со умилением прибегаем, молитв ваших пред Господем о возрождении и укреплении православия в стране нашей просяще.

Вы во обитель Раифскую со смирением вселилися есте, вся красная мира благорассудно оставивше, души и сердца ваша Создателю и Богу нашему принесше. В трудех и покаянии дни и нощи провождасте, молебное пение Пресвятой Богородице Приснодеве Марии ради иконы Ея “Грузинския” совершающе. Попущением же Божиим силы бесовския, в людех велию смуту сотворше, законы божеския и земныя попраша.

Сострадаем вам, преподобнии отцы, яко напасти и обиды от бесами искушенных людий претерпесте и из обители изгнани бысте. Вы же глаголы Спасителевы: “Блажени изгнани правды ради, яко тех есть Царствие Небесное”, - поминающе, благодарственное пение Ему возношасте. Судии же нечестивыя, диавольскою силою разжженныя, смерти вас, преподобнии иеромонаси Иосифе, Сергие, Варлааме, Иове, Антоние и послушниче Петре, предаша и отай погребоша.

Страдания ваша почитающе и яко милостивыя ходатаи за ны вас разумеюще, молим вас прощения грехов наших и грехов родителей наших у Господа испросити, такоже укрепления в исполнении заповедей Божиих, да, исполненнии Духа Святаго, победим козни лукаваго, духа гордости и зла насылающаго на ны. Молите Всевышняго о укреплении страны нашея Российския, благословении на добрая дела властителей ея, мире же и благоденствии всем людем.  Аминь.